zurück
Reiseberichte: Urlaub auf Kos und Umgebung
Franz Wiesmaier
Wei jo s´Weda dahoam zan davorenna woa ho i mi mid mein Weibaleid, an Koffa voi Gwond und Koffa volla Tschibugg und Towog (ma woas jo nia wias do unt ausgrisst san mid den Zeig) in Fliaga eigsitzt und guade zwoa Schtund schpeda san ma auf da Insl Kos glondt. Kos ghead jo a weng za Grichnlond, owa is a ned weid va da Tiakei weg.
Dahoam hods gschitt wia aus Küweln, wia ma drunt um zehne af d´Nocht ausn Fliaga aussekreit san, san ma se viakemma wia in an riesngrossn Bockofn. Wia ma donn a Schtund drauf im Hotei on da Poolbar gsessn san, hed i ma frei mein Tschibugg ned ozendn traud, wei bei dera Hitz nu a Gluad dazua mocha ghearad jo scho fost gstroft. Nochdem i owa ned da oazige gwen bi, der sei Raukzeig auspockt hod (de ondan owa nua Tschick und Zigarn) ho i ma donn do traud und s´dompfn ogfongt. Donn hed i glei amoi de fesche Könnarin va da Bar gfrogt, wo ma do ien Nest eventuoi grichische Pfeifn zan kaufn griagat. Se hod owa nua gmoat: Ai dount nouw, woudnt jou like sigretts or sigars, ser wi hef a lot of.
No ho i ma denkt, prowiastas hoid moagn in da Stod drin. Den nextn Tog sammar amoi am Strond glengn und hom se bei fünfaviazg Grad an Sonnenbrond ghoid. Mid da Pfeifn woas ned recht vui, wei Godseidang da Wind recht gonga is. Af d´Nocht san ma donn in´d Stod eigonga, mei Weibaleid ho is as Gwondoschau gschickt und i bin auf Pfeifnsuach gonga. In jedn zweit gscheft hods Zigretten und Zigarn haufnweis gebm, endlich ho i donn a Gscheft mid Towog gfundn. Clan, St. Bruno, Amphora, Skandinavik und sogoar a boa McBaren und Dunhills ho i gfundn. Oiso direkt zan vahungan fia d´Pfeifn was ned gwen, wonn a ned recht machti. Owa auf de Frog noch Pfeifn hod ma a der Kroma in den Lodn ned weidahöfn kinna. Aft ho is aufgebm und ho ma mei Weibaleid und an Retsina gsuacht. Schmeckt a ned schlecht zan Tschibugg.
Den viatn Tog san ma donn mit so an Touristnfrochta auf de Insl Kalymnos gfoan. Durt ho i unsa Reoseleiterin, de se do gonz guad auskennt hod, gfrogt, wo ma do vüleicht a griechische Pfeifn kriagn kinad. De hod donn mid a boa Einheimische af grichisch wos kaudawescht und is donn mid mia in a so a Tandlerei einproid. Duat hods donn wiakli a boa Pfeifn gem. A wegn kloa, a weng vui Kitt, ned unbedingt teia, owa a des Göd ned wert, und obs aus Olivnhoiz san, hod ma a koana sogn kinna, nua, dass af da Insl sunst niagends Pfeifn gibt und scho sicha zehn Joahr koana mehr um oane gfrogt hod. Des woa oiso a nix.
Den next Tog san ma donn nu af Bodrum in´d Tiakei umigfoan. Duat hed i scheni Measchaumpfeifn im Basar gfundn, owa soichane ho i eh scho gnua.
Am letztn Tog beim Flughofn hed i donn a nu a weng gschaud, owa nochdem Grichnlond jo bei da EU is, woas a duat nix mid djutifrii, nua an St. Bruno ho i gsegn und dea hod des gleiche kost wia drausstahoin Flughofn. Und a so hamma ohne grichische Pfeifm wieda hoamgflogn, da Urlaub woa drotzdem sche und zan weidaempföhn.
Pfeifologische Gesamtbeurteilung von Kos und Umgebung:
Pfeifen: Meerschaumpfeifen im Basar von Bodrum (Türkei) Tabak: Amphora, St. Bruno, Skandinavik fast in jedem Supermarkt, in der Fußgängerzone der Altstadt von Kos dann auch noch die oben beschriebenen Tabake.
Also: Pfeifen darf man auf keinen Fall vergessen, Tabak wird man zur Not schon finden, Filter und Reiniger eher nicht.
(16.08.2002)
